4.4 Circulo di compliment

Den e sesion aki nos lo enfoca riba e positivismo y con nos ta mustra esaki na otro. Ta cuminsa cu e reflexion riba nos deseo y limitenan pa asina enfoca solamente riba e parti positivo. Ta traha den grupo y hunto ilustra e cualidadnan positivo di cada alumno.

Obhetivo central di enseñansa basico: 4, 5 & 6

Duracion: 45 minuut

Conocemento:

• Alumno ta siña e importancia di comunica
• Alumno ta siña reconoce caracteristica basico di Amistad
• Alumno ta siña reconoce e 5 sintimentonan basico: felicidad, miedo, rabia, amor y tristeza

Habilidad:

• Alumno por indica comunicacion cu su compañeronan
• Alumno por indica importancia di comunicacion den amistad
• Alumno por distingui diferente rol den grupo
• Alumno por reconoce diferente manera pa expresa su sintimento y di otro
• Alumno por reconoce sintimento basico cerca su mes y otro
• Alumno por reacciona apropia riba sintimiento di otro

Actitud:

• Alumno ta capas di comunica habri y honesto
• Alumno ta capas di duna respet den combersacion
• Alumno ta capas di mustra empatia pa diferente situacion di su compañeronan
• Alumon ta capas di duna balor na otro
• Alumno ta capas pa traha cu otro
• Alumno ta capas pa tuma iniciativa

Structura:

Introduccion

Ehercicio di hala rosea; laga e muchanan sinta den un circulo. Cera wowo of wak riba vloer. Pone bo man riba bo bariga. Hala un rosea grandi for di bo nanishi, tene e rosea un rato, sac’e poco poco for di bo boca.Nos ta ripiti esaki 3 biaha. Habri wowo y nos ta cla pa cuminsa

VIDEO

Tur hende ta UNICO y valioso. Kico kiermen UNICO. Cu nuin hende no ta exactamente mesun cos.
Nos tur ta special; kisas abo ta hopi bon den deporte of bo ta un persona creativo. Kico ta algo cu bo ta bon aden? Kico ta algo cu bo ta orguyoso di dje? Kico ta haci abo diferente?

Nucleo

Practica cu e alumnonan;
Practica y siña reconoce cualidadnan positivo den nan mes y den otronan. Dividi e klas den 2 of 3 grupo. Nan tin cu sinta den un circulo. Cada alumno ta ricibi un A4 cu nan nomber skirbi mey mey. Nos ta bay duna otro compliment por medio di skirbi algo positivo di e persona cu bo tin e papel cu su nomber den bo man. 

Cosnan positivo manera:
– Personalidad: Alegre, pasenshi, pret, lief
– Talento: Creativo, Bon den pinta, deportivo, inteligente
– Accion: Gusta yuda otro, encurasha amigonan, semper honesto

E A4 tin cu pasa rond un pa un te ora cada mucha a ricibi 1 compliment di tur compañero di klas. Docente ta cana rond y controla e contenido di e compliment. Anima e alumnonan pa ta specifico; por ehempel; bo ta un hende pret paso semper bo ta haci diferente joke.

Alumno por reconoce su balor
Alumno ta ricibi su blachi y ta lesa e complimentnan cu el a ricibi. Ta scoge 1 compliment cu a destaca pa nan.

Clausura
Un reflexion cortico;E docente ta tira un bala pa un alumno ricibo turno. E alumno cu a ricbi e bala ta bisa un frase kico el a siña di e les awe y despues e alumno ta tir’e pa un otro alumno.

1. Presentacion digital

2. A4

3. Pen di color

4. Musica suave

5. Un bala chikito (di spons)